منہاج القرآن انٹرنیشنل کی سپریم کونسل کے چیئرمین ڈاکٹر حسن محی الدین قادری نے شہرِ اعتکاف میں اصلاحِ احوال اور آداب زندگی کے موضوع پر معتکفین کی تربیتی نشست سے خطاب کرتےہوئے کہا کہ اللہ نے انسانی جسم کے بیشتر اعضا جوڑوں کی صورت میں دو دو بنائے ہیں، لیکن دل کو اکیلا بنایا تاکہ دل اُس کی وحدانیت کی نشانی بن جائے۔ جب کسی کو دل کا عارضہ لاحق ہوتا ہے تو دنیا کے ظاہری دل کو بچانے کے لیے ڈاکٹرز کی ہدایت کے مطابق اپنی من پسند چیزیں تک کھانا بھی چھوڑ دیتا ہے، لیکن اپنے باطن کی دنیا کے دل کی فکر نہیں کرتا۔
انہوں نے کہا کہ جو لوگ اپنے باطن اور دل کے باطن کی فکر کرتے ہیں وہی اللہ کے عارف، ولی اور مقرب بندے بن جاتے ہیں۔ جس طرح ہم ظاہری دل کی بیماریوں کے کارڈیالوجسٹ کے پاس جاتے ہیں، اسی طرح ہمیں باطن کے دل کے علاج کے لیے اس کے معالج کے پاس جانا چاہئے اور وہ اللہ کے اولیاء و صالحین اور اُن کی مجالس ہیں۔ جب دل ہر قسم کے میلان اور شہوت سے پاک ہوکر صرف اللہ کی طرف رجوع کرلے تو پھر وہ قلبِ سلیم بن جاتا ہے۔
انہوں نے کہا کہ جو لوگ راتوں کو اپنے بستر چھوڑ کر اللہ کی یاد میں جاگتے ہیں، اس کے حضور رکوع و سجود کرتے ہیں، اس کی عطاء کردہ نعمتوں پر اس کا شکر ادا کرتے ہیں، وہی لوگ شیطان کے حملوں سے محفوظ رہتے ہیں۔ اولیائے رحمن کی صحبتیں، سنگتیں اور مجالس دنیا کی لذات، شہوات، رغبتوں اور گناہوں سے بچاتی ہیں۔ اگر آپ سرخرو اور کامیاب ہونا چاہتے ہیں تو اپنے وجود، جاہ و منصب اور اپنے بڑا اور اہم ہونے کے احساس کو گمنامی کی زمین میں دفن کردیں۔
تبصرہ